由細到大，我們都咁教細路：「失敗乃成功之母。」教他們唔好怕輸。相信大家都唔會懷疑這句話的道理。

有時候，講就天下無敵，要付諸實行就唔喺咁易。這種知易行難的任務，就喺我哋大人的責任。一個人為了成功可以去到幾盡？近日，睇新聞見到一則足球新聞，有球隊想出線就故意造成擺烏龍的賽果。可惜，「凡事太盡，緣份勢必早盡。」（電影《風雲》的一句話）天網恢恢，冥冥之中果然有安排。俾你得逞又如何？原來上天最後也會安排你俾人淘汰出局，與冠軍無緣。

亞洲盃足球賽正在卡塔爾多哈舉行。香港隊進入決賽周，身為球迷一定會留意。雖然零分出局，但喺一眾球員落力拼搏的表現，特別喺射入盃場歷史的第1000球，贏盡球迷的歡心。三戰三輸的香港隊，沒有輿論怪責任何一個球員表現不濟，反而大家都對他們豎起大拇指，贏了尊嚴的冠冕。

某天，我無聊落街場睇街坊踢波，又見到另一個足球小風景。因為無心做事，所以閒著看了一班足球小將踢足兩小時。紅白對決，白衣的球員個個懂得盤球運球，有腳法，有速度，踢出水準，入球不斷。原來有教練的細路多幸福！白衣一方有教練的循循善誘，臨場精心部署，打出默契。相反，紅色小隊也有一個教練，但喺一直不發一言，大概運用咗著名的「躺平管理學」的大師心法，教班細路無師自通。結果，白衣的細路年紀小小，有姿勢，又有實際，球王上身，贏得輕鬆。紅衣的一班雜牌軍像是在魚塘拋餌，街邊餵鴿（千奇唔好學），一見到飼料掉落，一群游魚和野鴿就盲目地蜂擁而上，沒有技術可言。紅白大賽，強弱分明，結果慘不忍睹。

球賽完畢，人影消失。晚風一吹，心頭一涼，心底突然勾起一個問題：如果失敗是成功之母呢句話喺真的，咁呢班細路可以從這場失敗的球賽中得到成功的經驗嗎？如果沒有從旁為失敗的人分析勝負的原因，為他們找出優點亮點，容許我誇張咁講句：輸的豈止是一場比賽，仲有喺輸掉對運動的興趣和自信心，你話嚴唔嚴重？傷唔傷害？

失敗乃成功之母，是因為當中要有「母愛」。鼓舞是失敗後的補充劑。只喺空口講做人要多些失敗經歷，就等於有些人成日講：「依家你唔明唔緊要架，大個咗之後就會明架喇。」各位父母、老師、教練……大家都喺細路仔的人生導師！如果你冇愛，就算細路輸咗一百次，都唔會在第一百零一次出現成功架。失敗乃成功之母呢句話就會變成呃細路嘅詐騙手段呢！

撰文: 陳瑞良校長

保良局黃永樹小學校長、香港初等教育研究學會主席

陳瑞良校長

保良局黃永樹小學校長、香港初等教育研究學會主席